22 янв 09:58
Янгиликлар

Бокс/ММА, Самбо

Фёдор Емельяненкога "Россияда хизмат кўрсатган мураббий" унвони берилди

Россия Федерацияси спорт вазири Михаил Дегтярев афсонавий MMA жангчиси Фёдор Емельяненкога самбо бўйича "Россияда хизмат кўрсатган мураббий" унвонини топширди.

"Юқори давлат унвони Емельяненконинг самбо ривожига, малакали спортчиларни тайёрлашга ва миллий яккакураш мактаби нуфузини мустаҳкамлашга қўшган кўп йиллик ҳиссасининг эътирофи бўлди", - дейилади Бутунроссия самбо федерацияси сайтидаги хабарда.

Маълумот учун, 49 ёшли Емельяненко жанговар самбо бўйича тўрт карра жаҳон ва тўққиз карра Россия чемпиони, самбо бўйича Россияда хизмат кўрсатган спорт устаси ҳисобланади.

Аралаш яккакурашларда "Сўнгги Император" лақабини олган Фёдор ўта оғир вазнда 40 та ғалаба ва 7 та мағлубият қайд этган. У сўнгги жангини 2023 йилнинг февралида ўтказган, ўшанда у америкалик Райан Бейдерга имкониятни бой берган (ТКО 1) эди.