Фьюри – Жошуа жанги бокс тарихидаги энг кассабоп жанглар рўйхатида тўртинчи ўринни эгаллади

12 декабрь куни Кардифф шаҳрида бўлиб ўтадиган Тайсон Фьюри ва Энтони Жошуа ўртасидаги жангнинг умумий чипта савдосидан тушган тушуми 34 миллион доллардан ошди. 

Бу ҳақда UFC ва Zuffa Boxing раҳбари Дана Уайт The Sun нашрига берган интервьюсида маълум қилди.

Ушбу кўрсаткич мазкур тадбирни бокс тарихидаги энг кассабоп шоулар рўйхатида (чипта савдоси бўйича) тўртинчи ўринга олиб чиқади. Ундан олдинги ўринларни Мейвезер – Пакьяо, Мейвезер – Макгрегор ва Кроуфорд – Сауль Альварес жанглари эгаллаб турибди.

Бундан ташқари, Фьюри – Жошуа жанги Британия бокс тарихидаги энг кассабоп тадбирлар рўйхатида биринчи ўринга чиқиб олмоқда ва аввалги рекордчини (Дэниэль Дюбуа ҳамда Энтони Жошуа ўртасидаги 18,5 миллион долларлик чипта тушумига эга жангни) катта фарқ билан ортда қолдирмоқда.

Эслатиб ўтамиз, Фьюри ва Жошуа ўртасидаги жанг учун барча 80 мингта чипта савдога чиққанидан кейин бир соат ичида сотиб бўлинганди. Бунда тахминан 700 минг мухлис Ticketmaster хизмати ва Кардиффдаги стадион сайтида виртуал навбатда қолиб кетган эди.

Бокс тарихидаги энг кассабоп ўнта жанг (чипта савдоси бўйича):

Флойд Мейвезер – Мэнни Пакьяо (2015) — $72,2 млн, Лас-Вегас.

Флойд Мейвезер – Конор Макгрегор (2017) — $55,4 млн, Лас-Вегас.

Теренс Кроуфорд – Сауль Альварес (2025) — $47,2 млн, Лас-Вегас.

Тайсон Фьюри – Энтони Жошуа (2026) — $34,0 млн, Кардифф.

Наоя Иноуэ – Жюнто Накатани (2026) — $32,0 млн, Токио.

Сауль Альварес – Геннадий Головкин I (2017) — $27,1 млн, Лас-Вегас.

Сауль Альварес – Геннадий Головкин II (2018) — $23,5 млн, Лас-Вегас.

Жервонта Дэвис – Райан Гарсия (2023) — $22,8 млн, Лас-Вегас.

Теренс Кроуфорд – Эррол Спенс (2023) — $21,0 млн, Лас-Вегас.

Флойд Мейвезер – Сауль Альварес (2013) — $20,0 млн, Лас-Вегас.

Британия боксидаги энг кассабоп бешта жанг (чипта савдоси бўйича):

Тайсон Фьюри – Энтони Жошуа (2026) — 26 млн фунт ($34 млн).

Дэниэль Дюбуа – Энтони Жошуа (2024) — 14 млн фунт ($18,5 млн).

Тайсон Фьюри – Диллиан Уайт (2022) — 12 млн фунт ($15,9 млн).

Энтони Жошуа – Владимир Кличко (2017) — 8 млн фунт ($10,6 млн).

Карл Фроч – Жорж Гроувз II (2014) – 5 млн фунт ($6,6 млн).