Георгий Аъзамов халқаро хотира турнири бош соврини Сербияга кетди ФОТОГАЛЕРЕЯ

Пойтахтимиздаги Халқаро шахмат академиясида ўзбекистонлик биринчи гроссмейстер Георгий Аъзамов хотирасига бағишланган “Ташкент опен-2022” XV Халқаро турнири бўлиб ўтди.

Мукофот жамғармаси 25 000 АҚШ долларига эга бўлган нуфузли турнирда иштирокчилар “А” ва “Б” гуруҳларига бўлинган ҳолда маҳоратларини синовдан ўтказишди.

Сербиялик гроссмейстер Александр Инжич халқаро турнирда 1-ўринни эгаллади. Кейинги ўринлар Жавоҳир Синдаров (Ўзбекистон) ва Евгений Романов (Норвегия)га насиб этди.

20 ёшгача бўлган ўсмирлар ўртасида Шамсиддин Воҳидов, Муҳриддин Мадаминов ва Абдумалик Абдусалимовларга тенг келадигани топилмади.

Фахрийлар ўртасида кечган беллашувларда Вячеслав Аъзамов ва Обиджон Юсупов ғалаба нашидасини сурди.

Аёллар ўртасида ҳамюртимиз, жаҳон чемпиони Умида Омонова 1-ўринни эгаллаган бўлса, қозоғистонлик Алия Нурманова ва Бибисара Ассайбаева 2- ва 3-ўринларга эгалик қилди. 20 ёшгача бўлган қизлар ўртасидаги баҳсларда яна бир вакиламиз Ситора Сапарова ғалаба қозонди.

Алимурод МАМАДАМИНОВ, ўз мухбиримиз