Германияда Президент соврини учун ўтказилган халқаро турнир муҳокама қилинди ФОТОГАЛЕРЕЯ

Анжуманда иштирок этган спортни ривожлантириш вазири Адҳам Икромов, Ўзбекистон кураш федерацияси раисининг биринчи ўринбосари, замонавий кураш қонун-қоидалари муаллифи Комил Юсупов, Миллий Олимпия қўмитаси вакили Камол Усмонов, мазкур халқаро турнирда кумуш медаль соҳиби бўлган ҳамюртимиз Шоҳрух Усмонов ва бошқалар Германияда ўтган кураш мусобақаларининг миллий қадриятларимиз тарғиботидаги аҳамияти, Янги Ўзбекистон тамойилининг халқаро майдондаги обрў-эътибори, ота-боболаримиздан мерос кураш спортини жаҳон бўйлаб оммалашишида ўтказиладиган турнирларнинг ўрни хусусида тўхталиб ўтишди.

Маълумки, Германияда мукофот жамғармаси 10 минг евро бўлган халқаро турнирда Европанинг 20 дан зиёд давлатидан полвонлар иштирок этиб, эркаклар +81 кг. вазн тоифасида, аёллар +63 кг. вазнда курашди.

Мусобақанинг қизлар баҳсида польшалик Сандра Лискин ғолиб чиққан бўлса, ўғил болалар ўртасидаги мусобақада сербиялик Александр Колобик Ўзбекистон Республикаси Президенти совринини қўлга киритди.

Франкфурт-Майн шаҳридаги баҳсларда 1-ўринни эгаллаган спортчилар 2500, 2-ўрин соҳиблари 1500 ва 3-ўриндан жой олган курашчилар 500 евро миқдоридаги пул мукофотлари билан тақдирланган эди.

Таъкидланишича, 28-29 май кунлари Болгарияда, 25-26 июнь кунлари Туркияда ҳамда июль ойида Францияда кураш бўйича Ўзбекистон Республикаси Президенти соврини учун халқаро турнирлар ўтказилиши режалаштирилмоқда.

Алимурод МАМАДАМИНОВ, ўз мухбиримиз