Grand Swiss. Чемпионлик учун курашаётган Рустам Қосимжоновдан кутилмаган натижа

Мукофот жамғармаси 433 000 АҚШ долларини ташкил этувчи Grand Swiss турнирида Ўзбекистон шарафини 17-жаҳон чемпиони Рустам Қосимжонов ҳамда 15 ёшли халқаро гроссмейстеримиз Нодирбек Абдусаттаров ҳимоя қилмоқда. Қосимжонов 2657, Абдусаттаров эса 2608 рейтинг очкосига эга. 

Кеча ўтказилган 9-партияда Рустам Қосимжонов оқ доналарда ўйнашига қарамай, кутилмаганда мағлубият аламини тотиб кўрди. Ҳамюртимиз британиялик гроссмейстер Дэвид Хоуэл (2694)га имкониятн бой берди ва нафақат чемпионлик, балки совринли ўринлар учун курашдан чиқди. 

Бугун ўтказиладиган 10-тур олдидан Қосимжонов 5 очко билан турнир жадвалида қўшимча кўрсаткичларга кўра 37-поғонадан жой олган. Рустам Қосимжонов бугун ўтказиладиган 10-турда оқ доналарда Богдан-Даниэль Дик (2613)ка қарши ҳаракат қилади.

Маълумот учун, 22 октябрь куни якунига етадиган Grand Swiss турнири ғолиби 70 000, иккинчи ўрин соҳиби 50 000, учинчи ўрин эгаси эса 40 000 АҚШ доллари миқдоридаги мукофот пулига эга бўлади. Кучли ўттизликка кира олган шахматчига эса 2000 АҚШ доллари тақдим этилади.