Grand Swiss. Рустам Қосимжонов 7-турда қандай натижа қайд этди?

Мукофот жамғармаси 433 000 АҚШ долларини ташкил этувчи Grand Swiss турнирида Ўзбекистон шарафини 17-жаҳон чемпиони Рустам Қосимжонов ҳамда 15 ёшли халқаро гроссмейстеримиз Нодирбек Абдусаттаров ҳимоя қилмоқда. Қосимжонов 2657, Абдусаттаров эса 2608 рейтинг очкосига эга. 

Кеча ўтказилган 7-партияда Рустам Қосимжонов оқ доналарда ҳаракат қилди ва ўзи сингари 3,5 очко жамғариб турган россиялик халқаро гроссмейстер Пётр Свидлер (2729) билан муносабатларига ойдинлик киритиб олди. Ушбу баҳсда томонлар муросага келишди. 

Кетма-кет дуранг натижалардан сўнг Рустам Қосимжонов 7 имкониятдан 4 очко жамғариб, турнир жадвалида қўшимча кўрсаткичларга кўра 32-ўринни эгаллаб турибди. У бугун ўтказиладиган 8-турда ҳиндистонлик халқаро гроссмейстер Пураник Абхиманюга қарши қора доналарда ҳаракат қилади. 

Маълумот учун, 22 октябрь куни якунига етадиган Grand Swiss турнири ғолиби 70 000, иккинчи ўрин соҳиби 50 000, учинчи ўрин эгаси эса 40 000 АҚШ доллари миқдоридаги мукофот пулига эга бўлади. Кучли ўттизликка кира олган шахматчига эса 2000 АҚШ доллари тақдим этилади.