Григор Димитров ўз ватанида мағлуб этилди

Бироз кутилмаганда дунёнинг 23-ракеткаси Григор Димитров иккинчи давра учрашувида мағлубият аламини тотиб кўрди. Болгариялик теннис устаси ўз ватандошлари кўз ўнгида рейтингнинг 71-поғонасидан жой олган беларуслик Илья Ивашкага 3/6, 6/7(3) ҳисобида ютқазиб қўйди. 

Бир соату 53 дақиқа давом этган баҳсда Димитров 5, Ивашко эса 3 та эйс зарбасини амалга оширди. Теннисчиларнинг ўзаро учрашувларида Ивашко ҳисобда олдинга чиқиб олди - 2:1. Ильянинг 1/4 финалдаги рақиби бугун ўтказиладиган италиялик Лоренцо Сонего ҳамда даниялик Хольгер Руне ўртасидаги баҳсдан сўнг маълум бўлади.