Гулруҳбегим Гибралтардаги иштирокини 128-ўринда якунлади

Анъанавий тарзда ўтказиб келинаётган “Gibraltar chess festival 2019” мусобақасида дунёнинг кучли гроссмейстерлари ва улар қаторида ҳамюртимиз, халқаро аёллар гроссмейстери Гулруҳбегим Тоҳиржонова (2446) ҳам иштирок этди.  

Максим Вашье-Лаграв (Франция, 2781), Левон Аронян (Арманистон, 2765), Уэсли Со (АҚШ, 2765), Хикару Накамура (АҚШ 2746), Цзюй Вэньцзюнь (Хитой, 2575), Анна Музичук (Украина, 2569), Катерина Лагно (Россия 2560) каби халқаро гроссмейстерлар, жаҳон чемпионларининг мусобақада иштирок этгани турнир нуфузидан дарак бериб турибди. 

Кеча ўтказилган сўнгги ўнинчи партияда Гулруҳбегим Тоҳиржонова оқ доналарда ўйнашига қарамай, ўзи сингари 5 очкога эга бўлиб турган Босния ва Герцеговиния вакили Денис Кадричга имкониятни бой бериб қўйди. Бу билан шахматчимиз 5 очко билан турнирни якунлади. Ўн имкониятнинг тенг ярмини қўлга киритган Гулруҳбегим қўшимча кўрсаткичларга кўра 128-ўрин билан кифояланди. 

Кечаги сўнгги 10-турда пешқадам россиялик Владислав Артемьев (2709) қора доналарда ҳаракат қилишига қарамай, хитойлик Ю Янг Йини таслим этди ва 8,5 очко билан мусобақа ғолибига айланди. Ҳиндистонлик Мурали Картикян 8 очко билан иккинчи ўринни эгаллади.