Гулруҳбегим Гибралтардаги турнирда дуранг ўйнади

Анъанавий тарзда ўтказиб келинаётган “Gibraltar chess festival 2019” мусобақасида дунёнинг кучли гроссмейстерлари ва улар қаторида ҳамюртимиз, халқаро аёллар гроссмейстери Гулруҳбегим Тоҳиржонова (2446) ҳам иштирок этяпти.  

Иштирокчилар орасида Максим Вашье-Лаграв (Франция, 2781), Левон Аронян (Арманистон, 2765), Уэсли Со (АҚШ, 2765), Хикару Накамура (АҚШ 2746), Цзюй Вэньцзюнь (Хитой, 2575), Анна Музичук (Украина, 2569), Катерина Лагно (Россия 2560) каби халқаро гроссмейстерлар, жаҳон чемпионларининг борлиги мусобақа нуфузидан дарак бериб турибди. 

Кеча саккизинчи партияда Гулруҳбегим Тоҳиржонова оқ доналарда россиялик россиялик Елизавета Соложенкинага қарши баҳс олиб борди ва дуранг натижа билан кифояланди. Бугун Тоҳиржонова ўзи сингари 4 очкога эга бўлиб турган англиялик Нигел Повахга қарши қора доналарда ҳаракат қилади.

Бугунги тур ўйинлари олдидан турнир жадвалида 6,5 очкодан жамғарган чехиялик Давид Навара (2738) ҳамда россияликлар Владислав Артемьев (2709) ва Кирил Алексеенко (2637) пешқадамлик қилишяпти. Бугун 9-турда Навара ва Артемьев ўзаро дона суришади.