Гулруҳбегим Гибралтардаги турнирда ғалабага эришди

Анъанавий тарзда ўтказиб келинаётган “Gibraltar chess festival 2019” мусобақасида дунёнинг кучли гроссмейстерлари ва улар қаторида ҳамюртимиз, халқаро аёллар гроссмейстери Гулруҳбегим Тоҳиржонова (2446) ҳам иштирок этяпти.  

Иштирокчилар орасида Максим Вашье-Лаграв (Франция, 2781), Левон Аронян (Арманистон, 2765), Уэсли Со (АҚШ, 2765), Хикару Накамура (АҚШ 2746), Цзюй Вэньцзюнь (Хитой, 2575), Анна Музичук (Украина, 2569), Катерина Лагно (Россия 2560) каби халқаро гроссмейстерлар, жаҳон чемпионларининг борлиги мусобақа нуфузидан дарак бериб турибди. 

Кеча тўққизинчи партияда Гулруҳбегим Тоҳиржонова қора доналарда ўйнашига қарамай, ўзи сингари 4 очкога эга бўлиб турган англиялик Нигел Повахни мағлуб этишнинг уддасидан чиқди. Бу билан шахматчимиз 5 очко билан қўшимча кўрсаткичларга кўра 106-ўринга кўтарилиб олди. 69-поғонадан жой олган аргентиналик гроссмейстер Фернандо Перальта ҳисобида ҳам айнан 5 очко бор. Гулруҳбегимнинг ўзи эса 108-рақам остида турнирда иштирок этяпти. 

Бугунги сўнгги 10-тур ўйинлари олдидан турнир жадвалида 7,5 очко жамғарган россиялик Владислав Артемьев (2709) пешқадамлик қиляпи. Кеча у асосий рақиби чехиялик Давид Навара (2738)ни мағлуб этди. Франциялик Максим Вашье-Лаграв, хитойлик Ю Янг Йи ва ҳиндистонлик Мурали Картикян ҳисобида 7тадан очко бор.