Гулруҳбегим Жаҳон кубоги йўлидаги иккинчи ғалабасига эришди

Бугун аёллар ўртасида ўтказилган иккинчи тур учрашувида халқаро гроссмейстеримиз Гулруҳбегим Тоҳиржонова ғалаба нашидасини сурди. Турнир рейтингида биринчи рақам остида таснифланган Тоҳиржонова оқ доналарда ҳаракат қилди ва қозоғистонлик Гулмира Даулетовани мағлуб этди. 

Нилуфар Ёқуббоева эса қора доналарда яна бир қозоғистонлик шахматчи Гулисхан Нахбаева билан дурангга имзо чекди. Баҳора Абдусатторова Мадина Давлетбаевага имкониятни бой бериб қўйди. Учинчи тур олдидан Тоҳиржонова ва Давлетбоева 2 тадан очко билан пешқадамлик қилишяпти. 

Айни дақиқаларда давом этаётган учинчи партияда айнан икки пешқадам ўзаро ҳисоб-китоб қилишяпти. Яна бир юртдошимиз Сарвиноз Қурбонбоева иккинчи турда ғалаба қозонди ва очколарини 1,5 тага етказиб олди. У қора доналарда ўйнаганига қарамай, қозоғистонлик Арнаш Бауржанни енгди.