Гулруҳбегимда ғалаба, турнир жадвалида қўшҳокимлик

Аёллар ўртасида ўтказилаётган мусобақанинг бешинчи турида халқаро гроссмейстеримиз Гулруҳбегим Тоҳиржонова муҳим ғалабани қўлга киритди. Турнир рейтингида биринчи рақам остида таснифланган Тоҳиржонова қора доналарда ҳаракат қилишига қарамай, қозоғистонлик Гулисхан Нахбаевани мағлубиятга учратди. 

Ўтган турда айнан Тоҳиржоновани мағлуб этган яна бир ҳамюртимиз Нилуфар Ёқуббоева эса бу турда оқ доналарда қозоғистонлик Гулмира Даулетова билан муросага келди. Бешинчи турдан сўнг турнир жадвалида Ёқуббоева ва Тоҳиржонова 4тадан очко билан қўшҳокимлик қилишяпти. 

Қозоғистонлик шахматчилар - Амина Каирбекова, Гулмира Даулетова ва Бибисара Ассаубаева 3,5 очкодан жамғариб, кейинги ўринларни банд этишган. Бугун 6-турда Гулруҳбегим қора доналарда Ассаубаевага қарши баҳс олиб боради. Ёқуббоева эса Каирбекова билан ҳисоб-китоб қилади.