Гулруҳбегимда мағлубият, Нилуфар якка пешқадам бўлиб олди

Аёллар ўртасида ўтказилаётган мусобақанинг олтинчи турида халқаро гроссмейстеримиз Гулруҳбегим Тоҳиржонова турнирдаги иккинчи мағлубиятини қабул қилиб олди. Турнир рейтингида биринчи рақам остида таснифланган Тоҳиржонова қора доналарда ҳаракат қилди ва қозоғистонлик Бибисара Ассаубаевага имкониятни бой берди. 

Тоҳиржоновага илк мағлубиятни тақдим этган яна бир ҳамюртимиз Нилуфар Ёқуббоева бу турда қора доналарда ўйнашига қарамай, қозоғистонлик Амина Каирбековани енгди ва 5 очко билан якка пешқадам бўлиб олди. Қозоғистонлик шахматчи қизлар - Гулмира Даулетова ва Мадина Давлетбаева партиясида ғолиб аниқланмади. 

Бугун ўтказиладиган олтинчи тур олдидан турнир жадвалида Нилуфар Ёқуббоева 5 очко билан карвонбошилик қиляпти. Бибисара Ассаубаева 4,5 очко билан иккинчи ўринни эгаллаб турибди. Гулруҳбегим Тоҳиржонова ва Гулмира Даулетова ҳисобида 4 тадан очко бор. 

Бугун 7-турда пешқадам Ёқуббоева оқ доналарда яна бир ҳамюртимиз, гроссмейстер Сарвиноз Қурбонбоевага қарши баҳс олиб боради. Гулруҳбегим оқ доналарда Амина Каирбекова билан ҳисоб-китоб қилади. Бибисара Ассаубаева ватандоши Гулмира Даулетова билан учрашади.