Гулруҳбегимда яна ғалаба, лекин у карвонбоши эмас

Аёллар ўртасида ўтказилаётган мусобақанинг саккизинчи турида халқаро гроссмейстеримиз Гулруҳбегим Тоҳиржонова яна ғалаба қозонди. Биринчи аёл гроссмейстеримиз Нафиса Мўминованинг синглиси бўлган Гулруҳбегим қора доналарда ўйнашига қарамай, яна бир гроссмейстеримиз Сарвиноз Қурбонбоевани мағлуб этди. 

Пешқадам Бибисара Ассаубаева ҳам қора доналарда муҳим ғалабани қўлга киритди. Қозоғистонлик шахматчи ватандоши Гулисхан Нахбаевани ютди. Нилуфар Ёқуббоева оқ доналарда қозоғистонлик Гулмира Даулетовадан устун келди. 

Турнир жадвалида Бибисара Ассаубаева 6,5 очко билан биринчи ўринни эгаллаб турибди. Нилуфар Ёқуббоева ва рейтинг пешқадами Гулруҳбегим Тоҳиржонова ҳисобида 6 очкодан бор. 

Бугун сўнгги тўққизинчи турда карвонбоши Бибисара Ассаубаева Сарвиноз Қурбонбоевани синовдан ўтказади. Агар мазкур қарама-қаршиликда ҳамюртимиз ғалаба қозона олса, Тоҳиржонова ёки Ёқуббоева жаҳон кубоги йўлланмасини қўлга киритади.