Гулруҳбегимнинг кутилмаган мағлубияти ФОТОГАЛЕРЕЯ

Аёллар ўртасида ўтказилаётган мусобақанинг тўртинчи турида халқаро гроссмейстеримиз Гулруҳбегим Тоҳиржонова кутилмаганда мағлубият аламини тотиб кўрди. Турнир рейтингида биринчи рақам остида таснифланган Тоҳиржонова оқ доналарда ҳаракат қилишига қарамай, яна бир ҳамюртимиз Нилуфар Ёқуббоевага имкониятни бой бериб қўйди. 

Ушбу ғалабаси эвазига Ёқуббоева мусобақа жадвалида 3,5 очко билан якка пешқадам бўлиб олди. Қозоғистонлик шахматчилар - Мадина Давлетбаева ва Гулисхан Нахбаева учрашувида дуранг қайд этилди. Гроссмейстеримиз Сарвиноз Қурбонбоева қозоғистонлик Гулмира Даулетовага ютқазиб қўйди. 

Баҳора Абдусатторова яна бир қозоғистонлик шахматчи Бибисара Ассаубаевага ютқазди. Бугун ўтказиладиган бешинчи тур олдидан Ёқуббоева 3,5 очко билан якка карвонбоши бўлиб турибди. Гулмира Даулетова ва Гулруҳбегим Тоҳиржонова ҳисобида 3 тадан очко бор. Бугун Нилуфар оқ доналарда Даулетовага қарши ўйнайди. Тоҳиржонова эса қора доналарда Нахбаева билан ҳисоб-китоб қилади. 

Суратлар муаллифи - Алимурод Мамадаминов