Ҳамиша қалбимиздасан, Камолиддин!

Бевақт ўлим дзюдо бўйича Ўзбекистон терма жамоасига номзод спортчи, халқаро тоифадаги спорт устаси, 2019 йилги Тошкент Гран-при турнирининг кумуш медали совриндори Камолиддин Расуловни орамиздан эрта олиб кетди. У кеча эълон қилинган IJF рейтингининг -81 кг вазн тоифасида 34-ўринни эгаллаб турганди. 

Очиғи, бу хабарни эшитган пайтда ишонмадим. Чунки, Камолиддин ростан ҳам жуда тарбияли, одобли эди. Уятчанлигидан ҳар сафар интервью сўраганимда рад жавобини олардим. Жавоби ҳар гал "ака, нима дейман" бўларди. Жамоадошларидан, таниган ва танимаган инсонларидан ҳеч қачон ёрдамини аямаган. Ана шундай фазилатларга эга инсон энди орамизда йўқ. У эндигина 29 ёшни қаршилаган эди. 

Камолиддин дзюдодан ташқари кураш ва самбо спорт турларида ҳам ижобий натижаларга эришган эди. 2012 йил самбо бўйича ёшлар ўртасида ўтказилган жаҳон чемпионати ғолиби бўлганди. Кураш бўйича ҳам жаҳон чемпионатининг олтин медалига эга чиққанди. 

Камолиддин Расулов 1992 йил 20 июль куни полвонлар юрти - Қашқадарё вилояти Шаҳрисабз тумани Мўминобод қишлоғида курашчилар оиласида дунёга келган. Қашқадарё полвонлар диёри бўлгани учун болалигидан курашга меҳр қўйди. Бунда табииийки, оилавий муҳитнинг таъсири катта бўлган. Кичик Камолиддин отаси ва акасининг изидан бориб, курашга меҳр қўйди. Спортдаги биринчи медалини Чироқчидаги турнирда қўлга киритган. -26 кг вазнда курашган ёш Расулов илк бор шоҳсупага кўтарилган эди. У ёшлигидан машҳур полвонлар Баҳром Авазов, Фарҳод Тўраев, Камол Муродовга ҳавас қилган. Абдулла Тангриев, Ришод Собиров сингари дзюдочиларимиздан илҳомланган. Илҳом Муродов, Асадулло Бозоров, Ўзбекистонда хизмат кўрсатган мураббий Равшан Аҳмаджоновдан кураш, самбо сир-асрорларини ўрганди. 

Марҳумнинг оила аъзолари ва яқинларига Яратгандан чиройли сабру жамийл тилаймиз. Ўтганларни Аллоҳ раҳматига олсин.