"Ҳумо" 2024 йилни меҳмондаги ғалаба билан якунлади

Хабар берганимиздек, Тошкентнинг "Ҳумо" хоккей клуби бу сафар Атирау шаҳрининг "Бейбарис" клуби меҳмони бўлди. Жамоалар ўртасидаги илк учрашувда (27.12.24) "Бейбарис" 1:0 ҳисобида ғалаба қозонган эди.

Кеча иккинчи учрашув ўтказилди. Ўйиннинг асосий вақти ҳамда овертайм 1:1 ҳисобидаги дуранг билан якунланди. Буллитлар сериясида эса омад "қанотлилар"га кулиб боқди ва "Ҳумо" 2:1 ҳисобида ғалабага эришди. "Бейбарис"нинг ягона голига Альберт Гатин муаллифлик қилган бўлса, тошкентликлар сафида Вадим Кравченко ҳамда Артём Лихотников шайба киритди.

Мазкур ғалабадан кейин "Ҳумо"нинг очколари сони 41 тага етди. Клуб турнир жадвалида шайбалар нисбати бўйича учинчи ўринда бормоқда. Жамоанинг кейинги ўйинлари 9-10 январь кунлари Тошкентда "Горняк"ка қарши бўлиб ўтади.