"Ҳумо Арена"да "Олимпия куни" нишонланди: "Ўзбегим" шеъри, эстрада юлдузларидан концерт ва бошқалар (ФОТОГАЛЕРЕЯ)

Бу йилги "Олимпия куни" аввалги йиллардан фарқли равишда, катта тантана билан ташкил этилди. Байрамга пойтахтимиз марказида қад ростлаган муҳташам "Ҳумо Арена" мезбонлик қилди. 

Байрамда эсда қоларли ҳолатлардан бири сифатида шуни кўрсатишимиз мумкинки, мамлакатимиздаги спорт федерациялари "Ҳумо Арена" павильонларида ўз "бурчаклари"ни жойлаштиришди. Ушбу "бурчаклар"да спорт федерациялари эришган ютуқлар, натижалар, амалга оширилган ишлар ҳақида маълумотлар берилди. Мухлислар у ерда спорт юлдузлари билан суратга тушиш имкониятига эга бўлишди. 

Соат 19:00 дан сўнг эса аренада асосий байрам тантаналари бошланди. Дастлаб саҳнага ўзбек спорти тарихида ўзига яраша из қолдирган спортчилар чиқиб келишди. Ўзбекистон Республикаси давлат мадҳияси янграгандан сўнг Халқаро Олимпия қўмитаси президенти Томас Бахнинг "Олимпия куни" муносабати билан йўллаган табриги ўқиб эшиттирилди. Сўнгра Ўзбекистон Республикаси президентининг ёшлар, фан, таълим, соғлиқни сақлаш ва спорт масалалари бўйича маслаҳатчиси Абдужаббор Абдувоҳидов, Бош вазир ўринбосари Азиз Абдуҳакимов, Миллий олимпия қўмитаси президенти Рустам Шоабдураҳмоновлар сўзга чиқишди ва ўзларининг энг самимий тилакларини билдириб ўтдилар. 

Сўнгра спортчиларимиз Эркин Воҳидовнинг "Ўзбегим" шеърини кетма-кетликда айтишди. Кейин кечанинг бадиий қисми бошланди. Ўзбек эстрадаси юлдузларининг чиқишлари йиғилганларга ҳақиқий байрам кайфиятини туҳфа этди.

Эътиборингизга бугунги байрамдан олинган суратларни тақдим этамиз:

Суратлар муаллифи - Жаҳонгир Файзуллаев