"Ҳумо" - "Арлан" учрашуви тақдирини буллитлар серияси ҳал қилди

Бир кун аввал ўтказилган илк учрашувда "Ҳумо" 4:3 ҳисобида ғалаба қозонганди. Кечаги ўйинда "қанотлилар" 0:2 ҳисобида ортда бора туриб, камбэкка эришишди. Аммо ўйин якунланишига бир дақиқадан сал кўпроқ вақт қолган бир пайтда "бўрилар" ҳисобни тенглаштиришди - 3:3! 

Беш дақиқадан иборат овертаймда ҳисоб ўзгармади. Буллитлар сериясида эса омад меҳмонларга кулиб боқди. "Арлан"ни мағлубиятдан қутқариб қолувли шайба муаллифи Степан Санников буллитлар сериясида ҳам ўзини кўрсатиб, учрашув қаҳрамонига айланди. 

Бу икки жамоа турнир жадвалида ёнма-ён жойлашган. "Ҳумо" 54 очко билан турнир жадвалида иккинчи ўринни эгаллаб турган бўлса, учинчи поғонадаги "Арлан" ҳисобидаги очколари 51 тага етди. "Торпедо" клуби 56 очко билан пешқадамлик қилмоқда. 

"Ҳумо" клуби навбатдаги икки учрашувни ҳам ўз мухлислари кўз ўнгида ўтказади. 31 январь ва 1 февраль кунлари "Ҳумо Арена"да 8-ўринда бораётган "Номад" клуби меҳмон бўлади. Айнан мана шу икки ўйин билан Қозоғистон чемпионати якунланиб, плей-офф босқич баҳсларига старт берилади.