"Ҳумо" бош мураббийи кечаги ғалабадан кейин нималар деди?

Хоккейчиларимиз Pro Hokei Ligasy'даги олтинчи учрашувни Атирауда турнир жадвали етакчиларидан бири "Бейбарис"га қарши ўтказиб, 5:2 ҳисобида зафар қучишди. Ушбу ғалабадан сўнг "Ҳумо" 6 очко билан 6-ўринга кўтарилиб олди. "Бейбарис" эса мағлубиятдан сўнг учинчи поғонага тушиб қолди.

Ўйиндан сўнг ўтказилган матбуот анжуманида "Ҳумо" бош мураббийи Евгений Попихин саволларга жавоб қайтарди. 

- Иккита яхши ўйин гувоҳи бўлдик. Ажойиб рақиб. Қозоғистоннинг энг кучли жамоаларидан бири. Биринчи учрашувда ўйин тенг бўлди. Ўзимизнинг қўпол хатолар эвазига аламли мағлубиятни сотиб олдик. Ўйинда интизомни кўрмадим. Жами 20 дақиқалик жарима натижада акс этди. Бугун эса йигитлар хатолардан тўғри хулоса чиқариб, муҳим ўйинда ғалаба қозонишди. Ишлашда давом этамиз. 

- “Ҳумо”нинг кейинги ўйинларидан қандай натижа кутсак бўлади?

- Лига ўйинларини таҳлил қила туриб, шунга амин бўлдимки, исталган жамоа бир-бирини мағлуб этиб қўйиши мумкин. Бу амалда ҳам бўляпти. Чемпионатда ўткинчи ўйинлар йўқ. Жамоавий ўйин ва интизомни жойига қўя олсангиз, ғалаба сизники бўлади. Ҳар бир учрашув - бу чақириқ. Ҳар битта ўйинда бошидан то серена чалингунича охиригача курашиш керак. Ютиш учун рақибга қараганда кўпроқ хоҳиш, тўғри ўйнаш ва ҳаракат бўлиши лозим.