"Ҳумо" бош мураббийи кечаги мағлубият сабабларини изҳолади

Хабар берганимиздек, кеча оқшом "Ҳумо" Олий хоккей лигасининг навбатдаги турида Москва вилоятининг "Химик" клуби меҳмони бўлиб, 2:4 ҳисобида имкониятни бой берган эди. Учрашувдан сўнг ўтказилган матбуот анжуманида "Ҳумо" устози саволларга жавоб берди. 

- "Химик"ни ғалаба билан табриклайман, - дея сўз бошлади Е.Попихин. - Ўйинни жуда яхши бошлаган эдик. Лекин кетма-кет иккита жуда қулай, голга тортадиган вазиятда Воронинга совуққонлик етишмади. Иккита вазият кўкка совурилди. Натижада хоккейнинг олтин қоидаси ишга тушди. Мезбонлар кетма-кет уч бор дарвозамизни ишғол қилишди. Яхшиям учта голдан кейин "сочилиб" кетмадик. Йигитлар характер кўрсатишга уринишди. Биринчи жавоб шайбаси киритилди. Иккинчи бўлимда устунликка эришдик. Аммо, вазиятлардан фойдаланиш бугунги ўйинда "нол"га тенг бўлди. Яценконинг ўзи иккита юз фоизлик имкониятдан фойдалана олмади. Ўтказиб юборилган тўртинчи шайба эса бизни "дафн" этди.   

- "Ҳумо" кейинги ўйинларини "Звезда", "Тамбов", "Буран" ва "Ростов"га қарши ўтказади. Бўлажак сафар ўйинларидан нима кутяпсиз?

- Биз ҳар бир ўйинга алоҳида тайёргарлик кўрамиз. Ҳозир плей-офф учун кураш кетяпти. Бу эса охиригача давом этади. Ҳар бир ўйинда худди охирги финал учрашувига чиққандек ҳаракат қилишимиз шарт. Бундай муҳим ўйинларда етакчилар, тажрибали хоккейчилар катта масъулиятни ўзларига олишлари керак. Бу ўйинчилар биз мураббийларга кўмакчи бўлишлари лозим. Сиз санаб ўтган клубларга қарши кечадиган ўйинларимизнинг натижаси етакчиларимизнинг ҳаракати ва ўйинига боғлиқ бўлади. 

- Биринчи бўлим сўнггида дарвозабон алмаштирилди. Бу сизнинг қарорингизми? 

- Ҳа, кимни алмаштиришни мен ҳал қиламан. Лекин бу алмаштирилиш Смирягин ёмон ўйнагани учун амалга оширилди дегани эмас. Уччала голда ҳам дарвозабонни тўлиқ айбламаган бўлардим. Ҳимоячилар рақиб хоккейчиларига зарба йўллаш учун қўйиб беришди. 

- "Звезда" клубидан Лозебников "Ҳумо" сафига келиб қўшилди. Кейинги ўйинда уни кўрамизми?

- Билмадим. Олдин бугунги ўйинни муҳокама қилиб олишимиз керак. У ўйинга тайёр.