“Ҳумо” бош мураббийи: Мен ўзбекман!

Олий хоккей лигаси (ВХЛ) доирасидаги ушбу учрашувдан сўнг ўтказилган матбуот анжуманида ҳар икки жамоа бош мураббийлари журналистларни қизиқтирган саволларига жавоб қайтаришди.

Эътиборингизга “Ҳумо” жамоаси бош мураббийи Евгений Попихин иштирокида ўтган матбуот анжуманини тақдим этамиз. 

- Гарчи учрашувда йирик ҳисоб қайд этилган бўлса-да, ўйин биз учун осон кечмади, - дея баҳс ҳақида фикр билдира бошлади Попихин. - Ўйинга жиддий тарзда тайёргарлик кўргандик. Рақиб иштирокидаги баҳсларини томоша қилиб, ўрганган эдик. “Буран” кучли ва яхши шаклланган жамоа. Дастлабки икки бўлим тенг курашлар остида кечди. Рақиб дарвозасини ишғол қилиб олганимиз яхши бўлди. Тўртинчи голимизни урганимиздан кейин бу ўйин бизники эканлигига шубҳа қолмади. Шундан кейин ёшларга ҳам имконият тақдим этдик. Энг муҳими, жуда муҳим ўйинда ғалаба қозондик. Йигитларга ўйин учун юз фоиз борларини берганлари учун раҳмат айтаман. 

- Михаил Анисинни таклиф қилиш кимнинг ғояси эди? Унинг бугунги ўйинидан кўнглингиз тўлдими? 

- Менимча, уни ким чақиргани муҳим эмас. Муҳими, у ҳозир биз билан. Бу унга ўзини кўрсатиш учун берилган имконият эканини жуда яхши билади. У яхши спортчи ҳамда хоккейни яхши кўради. Мен унинг имкониятларини яхши биламан. Минскнинг “Динамо” клубида ишлаб юрган кезларим Москванинг “Динамо”сига қарши ўйнаганмиз. Ўшанда Миша “Динамо” шарафини ҳимоя қиларди ва ўша 2012 йилда улар чемпион бўлишган. Плей-оффдаги учрашувда бизни шунчаки “сочиб” ташлашганди. Анисин эса ўйиннинг энг яхши хоккейчиси деб топилган эди. Катта тажрибага эга экани шундоққина ҳаракатларидан кўриниб турибди. Ўзи ҳам хушчақчақ йигит. Аренага келган мухлисларни жонлантириб юбора олади. Ўйлашимча, бу яхши трансфер бўлди. У бу ерга ишлаш, меҳнат қилиш учун келган. 

- Кетма-кет иккинчи уй ғалабаси. Жамоа ўйинида ўзгариш бўлгани кўриниб турибди. Тўрттала таркиб ҳам бирдек ўйнай бошлаган. Бугун Денис Мошаров, Антон Богацкий ва яна бир янги ўйинчи Арслан Ахметянов яхши таассурот қолдиришди. Айнан тўртинчи звено ўйини ҳақида қандай фикрдасиз? 

- Ахметяновга баракалла дейман. Бошқа нима ҳам дердим. Муҳим голни киритди. Ҳа, чемпионат пешқадамлари, Санкт-Петербургнинг  “СКА-Нева” ва “Динамо” клубларига қарши кечган учрашувларда асосан етакчиларга суяндик. Таваккал қила олмасдик. Рақибларнинг савияси умуман бошқача. Уй ўйинида эса ёшлар умуман бошқача ҳаракат қилишди. Ахметянов ҳам ўзига тақдим этилган имкониятдан фойдаланиб қолди. 

- Аренадаги умумий муҳит ва мухлисларнинг қўллаб-қувватлаши ҳақида нима дея оласиз? 

- Кундан-кунга, ўйиндан-ўйинга мухлисларнинг қўллаб-қувватлаши ошиб бормоқда. Таксида қаердансиз деган саволларга кўп дуч келяпман ва албатта ўзимни таништирганимдан кейин хоккей мавзусида суҳбат бўлади. Уларга мен ўзбекман деб жавоб бераман. Қанқасига ўзбексан дейишади. Шундай, москвалик ўзбекман деб жавоб қайтараман ва уларни “Ҳумо Арена”га таклиф қиламан.