"Ҳумо" мавсумолди илк трансферини эълон қилди

Жамоа янги мавсум олдидан илк трансферини эълон қилди. Унга кўра россиялик ҳимоячи Илья Назаревич эндиликда "қанотлилар" жамоаси сафида ҳаракат қилади. Илья шу кунгача Россия ва Беларуснинг 23 та жамоасида турли мусобақаларда 230 та ўйинда музга чиққан ва рақиблар дарвозасига 38 та шайба киритган. Шунингдек, Назаревич фаолияти давомида шерикларининг 58 та голига ҳаммуаллифлик қилган. Унинг сўнгги клуби Россиянинг "Звезда" жамоаси бўлиб турибди.

Назаревич жамоа билан келишувга эришганидан сўнг "қанотлилар"га салом йўллади:

"Ассалому алайкум, Ўзбекистон! "Ҳумо"дек жамоанинг бир қисмига айланганимдан жуда хурсандман. Тошкентда ажойиб арена ва учрашувлар пайтидаги муҳит мавжуд.

Мен ва оилам учун бу бошқа мамлакатда яшашнинг янги тажрибаси. Одамларнинг меҳмондўстлиги ҳақида эшитганмиз. Мен аллақачон музга чиқишни ва "Ҳумо" мухлисларини ўйинларимиз билан хурсанд қилишни интиқлик билан кутяпман.

Қачон келиб, ҳақиқий ўзбек паловини татиб кўрамиз, деб уйдагилар ҳозирдан сўрашмоқда. Болалар аллақачон Ўзбекистон байроғи ва харитадаги жойлашувига қизиқишмоқда. Улар ҳар доим янги дўстлар ва саргузаштлар орттиришдан хурсанд. Мен эса ўз навбатида, жамоага ўз мақсадларига эришиш ва клуб ҳамда мамлакатга ғалаба келтиришда ёрдам беришга қарор қилдим".

Аввалроқ, "Ҳумо" химоячиси Никита Зимин фаолиятини Россиянинг "Молот" жамоасида давом эттириши ҳақида хабар берган эдик.