01 ноя 09:58
Янгиликлар

Хоккей

"Ҳумо" пешқадамлардан бирини йирик ҳисобда мағлуб этди

Тошкентнинг "Ҳумо" хоккей клуби Қозоғистон Очиқ чемпионатининг навбатдаги турини ўз майдонида пешқадамлардан бири Қарағанданинг "Сариарка" жамоасига қарши ўтказди.

"Ҳумо Арена"нинг кичик мажмуасида ташкил этилган учрашувда "қанотлилар" йирик 5:1 ҳисобида зафар қучишди. "Сариарка" айни пайтда турнир жадвалида 21 очко билан 3-ўринни эгаллаб турибди. Иккинчи ўриндаги "Арлан" жамоаси ҳисобида ҳам 21 очко бор.

"Ҳумо" сафида Дмитрий Гренц дублга эришган бўлса, Вячеслав Литовченко, Владислав Дюкарев ва Александр Шевченко биттадан шайбага муаллифлик қилишди. Меҳмонлар таркибида киритилган ягона шайба Александр Коннов ҳисобига ёзилди.

Кечаги ғалабадан кейин "Ҳумо" клуби 15 очко билан 7-поғонадан жой олган. Лекин мамлакатимиз жамоаси "Сариарка"дан 3 та ўйин кам ўтказган. Бугун бу икки жамоа яна бир бор музда тўқнаш келишади. "Ҳумо" - "Сариарка" учрашуви соат 19:30 да бошланади.