"Ҳумо" яна камбэк қилди, "қанотлилар" муддатидан олдин плей-оффда!

Илк учрашувда "Ҳумо" Қозоғистон клубини 5:3 ҳисобида мағлубиятга учратган эди. Кечаги иккинчи ўйинда ҳам муз эгалари икки шайба фарқи билан зафар қучишди. "Ҳумо" бу сафар ҳам камбэк эвазига ғалабани ўз томонига оғдириб олди. Биринчи бўлиб ўз дарвозасидан гол ўтказиб юборган мезбонлар учинчи бўлимда ғалаба шайбасини киритишга муваффақ бўлишди. Андрей Павленко хет-трик муаллифига айланди. 

Ушбу ғалабадан кейин "қанотлилар"нинг очколари 45 тага етди ва жамоа учинчи ўринни эгаллаб турибди. Иккинчи поғонадаги "Кокшетау" ҳисобида ҳам 45 очко бор. "Ҳумо" муддатидан олдин плей-офф йўлланмасини қўлга киритди. Қолган учрашувларда қандай натижа қайд этилишидан қатъи назар, "Ҳумо" Топ-8`таликдан тушиб кетмайди. 

Энди "Ҳумо" кетма-кет 4 та учрашувни меҳмонда ўтказади. "Қанотлилар" 17-18 январь кунлари Руднийнинг "Горняк", 21-22 январь кунлари эса "Актобе" жамоасига қарши музга чиқишади. Кейин эса мавсумнинг сўнгги 4 та ўйинини "Ҳумо" ўз мухлислари кўз ўнгида ўтказади. 26-27 январь кунлари "Арлан", 31 январь ва 1 февраль кунлари "Номад" Тошкентда меҳмон бўлади.