"Ҳумо" ёш хоккейчилар учун ўзига хос тадбир уюштирди + ФОТО

Тадбир давомида Ўзбекистон хоккей федерацияси мутасаддилари, "Ҳумо" хоккей клуби раҳбарияти ва жамоа аъзолари, меҳрибонлик уйи тарбияланувчиларидан ташкил топган хоккей жамоаси аъзолари ва ОАВ ходимлари иштирок этишди. 

Ёш хоккейчилар "Ҳумо" кийиниш хонасига кириб, катта жамоадаги муҳитни ҳис қилишди. Ўша ернинг ўзида улар ўзларининг севимли хоккейчилари билан учрашиб, биргаликда суратга тушиш, дастхат олиш имкониятига эга бўлишди. 

Учрашув давомида "Ҳумо" бош мураббийи Евгений Попихин сўзга чиқиб, айнан мана шу ёш йигитлардан келажакда Ўзбекистон терма жамоаси аъзолари етишиб чиқиши, айнан улар келажакда жаҳон чемпионати ва Олимпия ўйинларида мамлакат шарафини ҳимоя қилишини таъкидлаб ўтди. Ёш хоккейчилар учун ўзининг энг самимий тилакларини билдириб ўтди. 

Шундан сўнг "Ҳумо" жамоаси томонидан ёш хоккейчиларга хоккей экипировкалари совға сифатида топширилди. 

Ўз навбатида болажонлар кўрсатилган бундай эътибордан хурсанд эканликларини яшириб ўтиришмади, ушбу учрашувдан бир олам таассурот олишди. 

"Бундай тадбирда иштирок этиш жуда ёқимли. Ёш хоккейчилар жуда кайфиятда олдимизга келишди, жамоамиз аъзолари ҳам ушбу учрашувдан хурсанд бўлишди. 

Ўзбекистонда "Ҳумо Арена" бунёд этилганидан сўнг хоккей бир поғона юқорига кўтарилди. Ўйинларга ҳам қизиқиш кучайиб бормоқда. Ўзбек мен учун меҳнатсевар, адолатли, жонкуяр ва маданиятли инсонлардир. Ушбу ҳислатлар хоккейчи учун айнан керакли жиҳатдир. Ишончим комилки, 10-12 йилдан ушбу ёш хоккейчилар терма жамоа юлдузи сифатида шаклланадилар. Агар инфратузилма тўғри йўлга қўйилса, мамлакатда хоккей ҳам ривожланади. Бугунги ёшлар келажакда ЖЧ ва Олимпиадада Ўзбекистон шарафини ҳимоя қиладилар. 

Байрам олдидан барчани муборакбод этаман. Бу ерда инсонлар ажойиб. Бозорларга бориб одамлар билан мириқиб гаплашасан, ҳазиллашасан. Мана шундай мамлакатда хоккейни янада ривожланишини истаймиз", - деди Евгений Попихин.

Суратлар муаллифи - Толибжон Қосимов