Ҳумоюн Султонов Брюссель турнири 1/2 финалида

Мукофот жамғармаси 25 000 АҚШ долларини ташкил этувчи ушбу мусобақада ҳамюртимиз Ҳумоюн Султонов ҳам муваффақиятли одимлаяпти. Мамлакатимизнинг биринчи ракеткаси мусобақанинг ярим финал иштирокчисига айланди.  

Брюссель турнирида учинчи рақам остида таснифланган Султонов 1/4 финалда норвегиялик Виктор Дурасовични 6/4, 2/6, 6/3 ҳисобида таслим этди. Скандинавиялик теннисчи ATP рейтингида 508-поғонадан жой олган. Ҳумоюн эса 330-ўринни эгаллаб турибди. 

Бугун Ҳумоюн финал чиптаси учун Эрги Киркинга қарши кортга чиқади. Туркиялик теннисчи турнирда биринчи рақам остида сараланган бўлиб, дунёнинг 254-ракеткаси бўлиб турибди. Бу теннисчилар учун ўзаро иккинчи учрашув бўлади. Шу йил январь ойида Қатардаги турнирнинг финалида Киркин Султоновни енгиб (3/6, 6/1, 7/5), бош соврин соҳибига айланганди.