27 июл 20:56
Янгиликлар

Теннис

Ҳумоюн Султонов икки ғалабаси эвазига Svijany Open асосий тўрига чиқди

Чехиянинг Либерец шаҳрида теннис бўйича Challenger 75 тоифасига кирувчи, мукофот жамғармаси 97 640 долларни ташкил этувчи турнир бўлиб ўтмоқда.

Ушбу мусобақанинг саралаш баҳсларида ҳамюртимиз Ҳумоюн Султонов ҳам муваффақиятли иштирок этди. Мамлакатимизнинг иккинчи ракеткаси 1/2 финалда чехиялик Доминик Речекни 6/3, 6/2 ҳисобида мағлуб этганди.

Бироз аввал якунига етган ва асосий тўрга йўлланма берган финал учрашувида саралашда еттинчи рақам остида таснифланган вакилимиз қийин ғалабани қўлга киритди. Султонов украиналик Александр Брайнинга қарши кечган 2 соату 14 дақиқалик баҳсда камбек амалга оширди - 3/6, 6/3, 7/5.

Таққослаш учун, Ҳумоюн Султонов айни пайтда ATP рейтингида 520, Речек 853, Брайнин эса 775-ўринни эгаллаб турибди.