Ҳумоюн Султоновнинг Australian Open'даги иккинчи рақиби маълум бўлди, улар аввал финалда тўқнаш келишган

Ўзбекистоннинг биринчи ракеткаси Ҳумоюн Султонов мусобақадаги иштирокини саралаш босқичидан бошлади ва ғалабага эришди. У илк босқичда колумбиялик Даниэль Элахи Галанни 6:3, 6:7, 7:5 ҳисобларида мағлуб этгани ҳақида аввалроқ хабар қилгандик. 

Таққослаш учун, Ҳумоюн айни пайтда дунё рейтингида 223, Галан эса 126-ўринни эгаллаб турганди. Вакилимиз ушбу ғалаба орқали 8 очко ишлаб олди. 

Теннисчимиз энди саралашнинг иккинчи босқичида чехиялик Далибор Сврчинага қарши баҳс олиб боради. У рейтингда 225-ўриндан жой олган. 

Маълумот ўрнида, Сврчина 17 ноябрь куни Мумбайдаги турнир финалида Ҳумоюнни 3/6, 6/1, 6/2 ҳисобларида мағлуб этганди. Ўшанда Султонов мусобақанинг биринчи, Сврчина эса иккинчи ракеткаси бўлганди. 

Навбатдаги учрашув 8 январь тонгида ўтказилади.