IBF чемпион Ломаченкога муҳлат белгилади

Чемпионлик ҳимояси учун биринчи мажбурий муддат ўтган йилнинг ноябрида берилганди. Ўшанда шифокорларнинг тиббий хулосаси билан украиналик боксчи жанг ўтказа олмаганди. Яъни, унинг машғулотда белидан олган жароҳати кутилганидан ҳам жиддийроқ бўлиб чиққанди.  

IBF Ломаченко ва унинг жамоасига иккинчи, сўнгги муддатни берди. Василий 8 октябрдан кеч бўлмаган муддатда ўз чемпионлик камарини ҳимоя қилиши шарт. Украиналик боксчининг рақиби вақтинчалик IBF камар учун ўзаро жанг ўтказадиган Заур Абдуллаев ва Рэймонд Мураталла ўртасида аниқланади. Агар Ломаченко белгиланган муддатгача бу жанг ғолибига қарши рингга чиқмаса, вақтинчалик IBF камари соҳиби тўлақонли чемпионга айланади.

Эслатиб ўтамиз, бир ойдан кейин 37 ёшга тўладиган Василий Ломаченко сўнгги бор ўтган йилнинг май ойида WBA, IBF ва WBO чемпионлик камарларининг собиқ соҳиби Жорж Кэмбосмосни мағлубиятга учратганди. Ўша жангда боксчилар Девин Хэйнидан вакант қолган IBF камари учун рингга чиқишган эди.