“Ичан қалъа”да этноспорт фестивали бўлиб ўтади

Куни кеча Хива шаҳрига туркиялик меҳмонлар ташриф буюриб, мазкур фестивалга тайёргарлик жараёни билан танишишди. Ўз навбатида шаҳарнинг қадимий обидаларидан бири - Нуруллабой мажмуасида ташкил этилган матбуот анжуманида иштирок қилишди. 

Хусусан, мазкур тадбирда Хоразм вилояти ҳокими Фарҳод Эрманов, Ўзбекистон Республикаси Инновацион ривожланиш вазири ўринбосари Ойбек Норинбоев, Ўзбекистон камондан отиш федерацияси раиси Отабек Имамов, Бутунжаҳон этноспорт Конфедерацияси президенти Нажмиддин Билол Эрдоған, Туркия ўқчилар вақфи раҳбари Ҳайдарали Илдиз қатнашди.  

Бинобарин, матбуот анжуманида илк бор уюштирилаётган мазкур этноспорт фестивали камондан отиш мусобақалари ва миллий ўйинлардан ташкил топганлиги, иштирокчиларининг ёши чегараланмаганлиги ва унда минг нафардан ошиқ спортчининг қатнашиши таъкидланди. Фестивални ўтказишдан кўзланган асосий мақсад эса йўқолиб бораётган миллий ўйинларни қайта тиклаш ва уларни келгуси авлодларга етказишга қаратилган.

Матбуот анжумани чоғида оммавий ахборот воситалари  ходимлари ўзларини қизиқтирган саволларга ҳам жавоблар олишди.

Икром ХУДОЙБЕРГАНОВ, Хива шаҳридан

Суратлар Хоразм вилояти ҳокимлиги матбуот хизмати томонидан тақдим этилди