Ига Свёнтек "Ролан Гаррос" чемпиони!

Польшалик теннисчи ҳал қилувчи финал учрашувида WTA рейтингида 15-ўринни эгаллаб турган италиялик Жасмине Паолинини умуман сезмади - 6/2, 6/1. Теннисчиларнинг ўзаро учрашувларидаги ҳисоб йириклашди - 3:0. 

Етмиш дақиқа давом этган баҳсда иккала теннисчи ҳам биттадан эйс зарбасини амалга оширишди. Қўшхатолар 0 га 2 кўринишида Жасмине фойдасига ҳал бўлди. Брейклар бўйича устунлик Свёнтек томонида - 5 га 1! 

Шу тариқа, Ига фаолиятидаги бешинчи "Катта Дубулға" турнири чемпионлигини қўлга киритди. У 4 карра "Ролан Гаррос" (2020, 2022, 2023, 2024) чемпионига айланди. Польшалик қаторасига учинчи йил ҳам Парижда чемпион бўлди. Унинг жовонида US Open-2022 бош соврини ҳам бор.

Свёнтек икки ҳафталик меҳнатидан 2 миллион 400 минг евро мукофот пули ҳамда 2000 рейтинг очкоси қўлга киритди. Унинг бу йилги мавсумдан ишлаб топган мукофот пули 6,9 млн, фаолиятидаги эса 31,5 млн долларга етди.