Ига Свёнтек - уч карра "Ролан Гаррос" ғолибаси!

Польшалик теннис маликаси Франция Очиқ чемпионатининг ҳал қилувчи финал учрашувида турнир кашфиётига айланган ва WTA рейтингида 43-ўринни эгаллаб турган чехиялик Каролина Муховани қийинчилик билан мағлубиятга учратди - 6/2, 5/7, 6/4.

Ига теннисчиларнинг ўзаро учрашувларидаги мувозанатни тиклади - 1:1. Икки соату 48 дақиқа давом этган финал баҳсида Свёнтек 1, Мухова 6 та эйс зарбани амалга оширган. Қўшхатолар ҳар икки теннисчида ҳам 3 тадан бўлди. Брейклар 7 га 5, Свёнтек фойдасига. 

22 ёшли Ига Cвёнтек тўрт карра "Катта Дубулға" турнири ғолибасига айланди. Унинг ҳисобида 3 та "Ролан Гаррос" (2020, 2022, 2023) ва 1 та US Open (2022) турнири бош соврини бор. У 2000 рейтинг очкоси ва 2,300,000 евро мукофот пулини қўлга киритди. Мухова эса икки ҳафталик меҳнатидан 1300 очко ва 1,150,000 евро ишлаб олди.