IJF расмийлари билан “Катта Дубулға”га тайёргарлик муҳокама қилинди

“Ҳумо Арена” мезбонлигида Токио Олимпиадасига қимматли рейтинг очколарини тақдим қилувчи бундай мусобақа илк бор юртимизда ўтказилаётгани унга бўлган тайёргарликнинг ҳам юқори савияда бўлишини талаб қилади. Бу борада Халқаро дзюдо федерацияси (IJF) Ўзбекистон МОҚ ва Ўзбекистон дзюдо федерацияси билан ҳамкорликда фаолият олиб бормоқда. 

МОҚ Бош котиби Ойбек Касимов, МОҚ раиси ўринбосари, Ўзбекистон дзюдо федерацияси раиси Азизжон Камилов мусобақаларни ўтказиш бўйича IJF менежери Лиса Аллан ва ушбу халқаро ташкилотда ишлаётган ҳамюртимиз Абдулло Муродов билан мусобақа ташкилий ишларига бағишланган қатор масалаларни муҳокама қилиб олишди.

Учрашувда Ойбек Касимов ҳамда Азизжон Камилов Тошкент “Катта Дубулға” турнирини ўтказиш, ташриф буюрадиган меҳмонлар учун қулайликлар яратиб бериш масалаларини ҳукуматимиз қўллаб-қувватлаётгани ҳақида алоҳида таъкидлаб ўтишди. 

Суҳбатда Халқаро ташкилот вакиллари мусобақанинг ҳозирги вазиятдан келиб чиққан талаблари бўйича атрофлича маълумот беришди. Унга кўра, ҳозирги мусобақаларда мухлисларнинг ташриф буюриши мумкин эмас. 

Кечаги учрашув давомида мухлислар учун алоҳида йўл қилиш ва “Ҳумо Арена”нинг иккинчи қаватини томошабинларга, биринчи қаватни эса спортчи ва делегацияларнинг бошқа вакилларига ажратиш масаласи кўриб чиқилди.

Бу таклиф сўнгги қарор эмас, албатта. Яқин вақт ичида ҳукуматимиз ва халқаро ташкилот мутасаддилари мазкур таклифни атрофлича ўрганиб, бу борада якуний фикрни айтишади. Мақсад эса мухлислар учун имкон қадар ҳақиқий спорт атмосферасини яратиб беришдир.