Иккинчи ракеткамиз Анталия турнири 1/8 финалига чиқди

Мукофот жамғармаси 115 000 АҚШ долларини ташкил қилувчи Megasaray Hotels Open турнирида вакиламиз Полина Кудерметова муваффақиятли старт олди. У 1/16 финалда испаниялик Зулета Маристанига қарши кортга чиқди. Етмиш тўрт дақиқа давом этган баҳсда вакиламиз 6/4, 6/1 ҳисобида зафар қучди. Полина 4, Зулета 3 та эйс зарбасини амалга оширган. Теннисчилар тўпни ўйинга киритишда қўшхатога йўл қўйишмади. 

Таққослаш учун, мамлакатимизнинг иккинчи ракеткаси айни пайтда WTA рейтингида 147, Маристани эса 171-ўринни эгаллаб турибди. Бу теннисчиларнинг ўзаро ўтказган иккинчи учрашуви бўлди - 2:0. Шу йил январь ойида Мельбурнда ўтган Австралия Очиқ чемпионатининг саралаш баҳсида ҳам Кудерметова Маристанини мағлубиятга учратган эди.  

Энди Полина Кудерметова 1/8 финалда турнирнинг иккинчи ракеткаси Моюка Учижимага қарши кортга чиқади. Япониялик теннисчи ҳозирда дунёнинг 77-ракеткаси бўлиб турибди.