Иккита камарга эришган Ислам Махачев ҳозир нимадан мотивация олаётганини айтди

"Ростини айтсам, карьерам бошидаги мотивация ҳозир йўқ. Лекин мен ҳали ҳам ғалаба қозонишни истайман. Эндиги мотивациям — мағлуб бўлмаслик ва чемпионлик камаримни сақлаб қолиш.

Мен камарларни қўлга киритдим. Яна бир вазн тоифасига ўтиб, яна чемпион бўлиш жуда қийин. Камтарлик қилмай айтаман, бу спортда деярли барча чўққиларни забт этдим.

Ҳозир эришганларимни йўқотишни истамайман. Шунинг учун ҳам машғулотларни давом эттиряпман. Одамлар мен учун қайғураётганини, мухлислик қилаётганини ҳис қилиб тураман.

Мен учун энг катта мақсад — болалар мендан яхши инсон сифатида намуна олишидир. Соғлом турмуш тарзига амал қилган, катталарни ҳурмат қилган, кичикларга яхши муносабатда бўлган ва яхши ота бўлган инсон сифатида.

Буюк спортчилар кўп бўлган ва яна бўлади. Мен эса яхши инсон сифатида эсда қолишни хоҳлайман. Болалар: “Мен Исламдек бўлишни хоҳлайман”, деб айтса ва ота-оналари бундан хурсанд бўлса, шунинг ўзи мен учун катта ютуқ", — деди Махачев.