ИНТЕРВЬЮ. Отабек Холматов жароҳати, операция ва тикланиш жараёни, Top Rank билан келишувга эришгани ва кейинги жангини қачон ўтказиши ҳақида гапирди

Суҳбатда Отабек оёғидаги жароҳати ва тикланиш ишлари, Top Rank билан келишувга эришгани ва кейинги жангини қачон ўтказиши ҳақида гапирди.

- Собиқ рақибингиз Раймонд Форд ўзининг биринчи ҳимоя жангини ўтказди. Унинг Ник Боллга қарши жангини томоша қилдингизми? Жанг сизни нимаси билан лол қолдирди?

- Ҳа, бу жангга келадиган бўлсак, иккаласи ҳам жуда кучли боксчилар эди. Ўша бокс оқшомидаги жангларни томоша қилдим. Айниқса, Форд билан Боллнинг жанги қизиқарли бўлди. Насиб қилса, улар билан қачонлардир рингда кўришамиз.

- Раймонд Форд ҳақида нима дейсиз? У ўзини илк ҳимоя жангидаёқ мағлуб бўлди. Буни кутганмидингиз?

- Мен Форд жангда ғалаба қозонса керак, деб ўйлаган эдим. Лекин рақиби унга қараганда ғалаба учун кўпроқ ҳаракат қилди. Унинг омади ҳам келди ва ғалаба қозонди.

- Ҳозирги ҳолатингиз ҳақида гапирсангиз. Сўнгги жангингизда жароҳат билан ҳаракатланган эдингиз.

- Ҳозирги ҳолатимга келсак, оёғимдан жиддий жароҳат олган эканман. Алҳамдулиллаҳ, жарроҳлик амалиёти муваффақиятли ўтди. Оёғим секин-асталик билан ўзининг ҳолатига қайтмоқда.

- Қаерда ва қайси жамоа билан шуғулланяпсиз?

- Айни пайтда АҚШнинг Калифорния штати, Индио шаҳрида ўзимизнинг ўзбек боксчилари, акаларим билан бирга бўлиб турибман. Ин Шаа Аллоҳ, эндиликда жангларимни Top Rank промоутерлик компанияси ўтказади. Оёғимдаги жароҳат анча яхшиланиб қолди. Насиб қилса, йилнинг охиригача рингга қайтаман.

Маълумот учун, сирдарёлик 25 ёшли чарм қўлқоп устаси проф боксда ҳозиргача 13 та жанг ўтказиб, 12 ғалаба ва 1 мағлубият қайд этган. У ягона мағлубиятини март ойида америкалик Раймонд Форддан қабул қилиб олганди. Мазкур жанг ярименгил вазнда WBA камари учун ўтказилган эди.

Диёр Мавлонов суҳбатлашди.