Иш ёпилди: Жервонта Дэвисдан оилавий зўравонлик бўйича айблов олиб ташланди!

Энди ундан барча айбловлар олиб ташланди ва у фаолиятини давом эттириши мумкин. Флорида прокуратураси Дэвисни ўз қизининг онаси Ванесса Поссога ҳужум қилганликда айблаб, уни ўз уйида калтаклаганини маълум қилганди, бироқ аризачи Поссо ўз айбловларидан воз кечди. 

"Айблов томони, жабрланувчи ва ҳимоячи айбланувчининг ғазабини бошқариш курсини ўташи кераклиги ҳақида келишиб олдилар", - дейди прокурор матбуот котиби Аарон Савички. 

Бровард округи шерифи 2022 йил 27 декабрда Дэвисни ўз уйидан ҳибсга олиб, бир аёл полицияга қўнғироқ қилиб, унинг бошига ургани ва лабининг ички қисмида кичик жароҳат қолдирганини айтган эди. Боксчи 1000 доллар гаров пули эвазига Бровард округи бош қамоқхонасидан озод этилганди. 

TMZ томонидан жабрланувчининг 911 рақамига телефон қилган ёзуви ҳам эълон қилинган эди: "У мени ўлдиради!... Илтимос, ёрдам керак! Мен уйга қайтишга ҳаракат қиляпман. Машинамда болам бор. У боланинг кўз ўнгида менга ҳужум қилди. Ҳозир у менинг шиналаримни бузади!".

Кейинроқ қиз жанжал пайтида ишонч телефонига қўнғироқ қилганидан пушаймон эканини ҳам айтиб ўтган эди: 

"Ўзаро муносабатларимиз заиф эди. Жанжалда Жервонта ҳам, мен ҳам айбдор эдик. Туйғулар кучайиб кетганда, мен ҳуқуқни муҳофаза қилиш органларига кераксиз телефон қўнғироқларини амалга оширдим. Жервонта менга ҳам, қизимизга ҳам ёмонлик қилмади".