Ишчи гуруҳ Поп тумани спорт мактаби фаолиятини ўрганмоқда

Маълумки, охирги йилларда республикамизда жисмоний тарбия ва спортни оммалаштириш, аҳоли ўртасида соғлом турмуш тарзини тарғиб қилиш, имкониятлари чекланган шахсларнинг жисмоний реабилитацияси учун зарур шарт-шароитлар яратиш ҳамда мамлакат спортчиларининг халқаро спорт майдонларида муносиб иштирок этишини таъминлаш борасида изчил чора-тадбирлар амалга оширилмоқда.

Куни кеча ишчи гуруҳ томонидан куннинг иккинчи ярмида Поп туманида жисмоний тарбия ва спорт соҳасида олиб борилаётган ишлар ва спорт мактабларида шуғулланаётган иқтидорли спортчиларни саралаб олиш ҳамда улардан спорт турлари бўйича ҳудудий терма жамоаларни шакллантириш бўйича қилинган амалий ишлар билан яқиндан танишилди.

Тумандаги болалар-ўсмирлар спорт мактабида 1058 нафар ёшлар спортнинг 19 та тури бўйича машғулотлар ўтаказиб келган. Спортчиларга жами 43 нафар тренер сабоқлар бериб келар эди. Айни пайтда туман «қизил» ҳудудлар тоифасига киритилганлиги сабабли ушбу   таълим муассасаси вақтинчалик иш фаолиятини тўхтатиб турибди.

Туман дзюдо, бокс ва юнон-рум кураши спорт турларига ихтисослаштирилган бўлиб, спорт мактабида ушбу спорт турларидан Миллий терма жамоа аъзоларини етиштириб чиқариш бўйича изланишлар олиб борилмоқда.

Ишчи гуруҳ томонидан муассасанинг фаолияти ўрганилиб, Президент фармон ва қарорлари, Вазирлар Маҳкамасининг қарорлари, шунингдек, жисмоний тарбия ва спорт вазирининг ички буйруқлари ижроси юзасидан керакли кўрсатмалар берилди.