Наманганда “Саломатлик сари 10 000 қадам” марафонига старт берилди

Мазкур саломатлик марафони Давлатобод туманида жойлашган Янги Ўзбекистон боғи ҳудудида юқори кайфиятда бошланди. Тадбир Наманган вилояти спорт бошқармаси ҳамда вилоят соғлиқни сақлаш бошқармаси ҳамкорлигида ташкил этилди.

Марафонда нуронийлар, спортчи ёшлар, тиббиёт ходимлари, турли ташкилот ва корхона вакиллари ҳамда кенг жамоатчилик фаол иштирок этди. Иштирокчилар дастлаб 10 000 қадамлик юриш марафонида қатнашиб, соғлом турмуш тарзига содиқликларини намоён этдилар.

Тадбирнинг расмий очилиш маросимида вилоят ҳокими Шавкатжон Абдураззоқов сўзга чиқиб, барчани соғлом ҳаёт тарзига амал қилишга чақирди.

Марафон доирасида иштирокчилар учун бой маданий ва спорт дастурлари ҳам тақдим этилди. Эстрада юлдузларининг чиқишлари, спортчиларнинг кўргазмали намойишлари ҳамда мода кўргазмалари тадбирга янада кўтаринки руҳ бағишлади.

Тадбир якунида “Ҳоким кубоги” мусобақалари доирасида олий таълим муассасалари ўртасида ўтказилган спорт беллашувларида ғолибликни қўлга киритган жамоалар муносиб тақдирланди.