Фёдор Емельяненко: "Дана Уайт фаолиятимни бўғиб қўймоқчи эди"

"Дана Уайт билан шахсий учрашувимиз бўлган, лекин ростмана айтсам, унинг барча ҳаракатларининг моҳиятини тушунмадим, чунки у ўзининг барча кўриниши билан мен унда жанг қилишимни истаётгандек эди. Лекин ундан олдинги жангда, мен эркин бўлганимда, улар мен билан шартнома имзоламаган эди. Ва ҳар сафар шундай бўларди: мен эркин бўлсам – мен уларга қизиқ эмасман, мен банд бўлсам – турли таклифлар кела бошлайди.

Агар сиз шартномада бўлсангиз, сиз битим туза олмайсиз, чунки улар сизга қарши даъво қўзғатишади ва суд ишлари давом этаётган вақтда, Америкада сиз жанг қила олмайсиз, боиси тақиқ остида бўласиз. Тушунишимча, улар шунчаки менинг фаолиятимни бўғиб қўймоқчи эди. Шартнома имзолашади, аммо менга Strikeforce даъво қўзғайди ва мен на у ерда, на бу ерда жанг қилмайман, мана шу холос", – деди "Сўнгги император" "Ушатайка" каналига берган интервьюсида.

Шунингдек, Емельяненко дунёдаги энг кучли лига раҳбарини аралаш яккакураш индустриясининг афсонаси деб ҳисобламаслигини билдирди.

"Тадбиркорлар ҳам турлича бўлади. Маданиятли, покиза бўлган инсонлар борки, уларга ҳатто шартнома тузиш ҳам шарт эмас – қўл бериб сўрашиш кифоя. Улар ўз сўзининг устидан чиқади. Ҳозир эса Дана ҳар хил бемаъни гапларни гапиради – бир марта мен билан шартнома имзоламоқчи эди. Яна бир марта бунинг акси. Қайсидир пайт шартнома имзоламаганидан афсусланади, бир марта шартнома имзоламаганидан хурсанд бўлади… Яъни, инсон гапиради ва ҳатто ўз сўзлари учун жавоб бермайди. Шунинг учун менга унинг бизнес юритиш усули яқин эмас. Лекин кимдир уни афсона деб билса – улар учун афсона бўлаверсин", – дея қўшимча қилди Фёдор.