Бектемир яна кутадиган бўлди. Мунгия расман рус боксчисига қарши жанг ўтказади

Мағлубият нималигини билмай келаётган россиялик Никита Зонь WBA жаҳон чемпионилик камари учун Хайме Мунгияга қарши рингга кўтарилади. RCC Boxing боксчиси, шунингдек, амалдаги WBA Gold камари соҳиби, россиялик Никита Зонь 31 октябрь куни Саудия Арабистонида бўлиб ўтадиган катта бокс кечаси доирасида мексикалик Хайме Мунгия (46-2, 35 КО/ТКО) билан иккинчи ўрта вазнда WBA World жаҳон чемпионилик камари учун жанг қилади. 

Эслатиб ўтамиз, 33 ёшли Никитанинг профессионал рекордида 12 та ғалаба бор, шулардан 10 таси нокаут орқали қўлга киритилган, ҳисобида мағлубият йўқ, фақат бир жангида дуранг натижа қайд этилган. Зонь WBA рейтингида тўққизинчи ўринни эгаллаб турибди.

Ўз навбатида, Хайме 46 та ғалабага эга, шулардан 35 таси нокаут орқали қўлга киритилган, иккита жангда мағлубият аламини тотиб кўрган. Мексика вакили 30 ёшда. 

Аввалроқ, Мунгия ўз камари учун мажбурий даъвогар боксчи Бектемир Мелиқўзиевга қарши 2027 йилнинг баҳорида жанг ўтказиши мумкинлигини айтган эди.