Бибисара қўнғироқ чалиб бошлаб берган Clutch Chess турнирининг иккинчи куни Жавоҳир қандай натижа қайд этди?

Бу турнир Жавоҳир учун ҳиндистонлик амалдаги жаҳон чемпиони Гукеш Доммараджуга қарши Жаҳон тожи учун матч олдидан сўнгги синов бўлмоқда. Мусобақанинг мукофот жамғармаси 425 000 АҚШ долларини ташкил этади. 

Турнирнинг иккинчи кунини Синдаров мағлубият билан бошлади. Ҳамюртимиз ҳиндистонлик Рамешбабу Прагнанандҳани илк партияни ютқазиб қўйди. Кейин эса қора доналарда ўйнаганига қарамай, рақибини таслим этди ва илк учрашувдаги мағлубият учун муносиб реванш олди. Иккинчи турда Жавоҳир АҚШ вакили Фабиано Каруана билан бир мағлубият ва бир дурангга рози бўлди. Учинчи турдан ўрин олган Жавоҳир Синдаров - Ҳикару Накамура (АҚШ) учрашувининг ҳар икки партиясида ҳам муроса йўли танланди. 

Шу тариқа, гроссмейстеримиз иккинчи кунги баҳслардан сўнг 8,5 очко жамғарди ва турнир жадвалида 2-ўринни сақлаб қолди. Жавоҳир ўз ҳисобига ҳозирча 3000 АҚШ доллари миқдоридаги мукофот пулини қўшиб қўйди. Фабиано Каруана ҳисобида ҳам 8,5 очко бор. Биринчи турдан сўнгги ўринда бўлган Рамешбабу Праггнанандҳа 11 очко билан якка пешқадамга айланиб олди. Ҳикару Накамура ҳисобида 8 очко бор. 

Маълумот учун, турнирда ҳар бир шахматчи 18 тадан рапид партия ўйнайди. Вақт назорати — 10 дақиқа ва ҳар бир юришга 5 сония қўшиб берилади.

Турнирнинг ўзига хос жиҳати — ғалаба учун бериладиган очколар ҳар куни ортиб боради:

1-кун — 1 очко

2-кун — 2 очко

3-кун — 3 очко

Демак, бугун ўтказиладиган сўнгги кунги битта ғалаба биринчи кундаги учта ғалабага тенг бўлади. Яъни, ғалабага 3 очко берилади.