Ислам Махачев: "Онам ММАдаги фаолиятимни якунлашимни хоҳлаяпти. Ҳаммаси тамом, шекилли"

"Биз онам билан бу масалани кўп йилдан бери муҳокама қилиб келамиз. ММАдаги профессионал фаолиятимни бошлашдан олдин жанговар самбо бўйича жаҳон чемпиони бўлганман. Буни яхши эслайман. Онам "Бўлди. Самбода Олимпия ўйинлари йўқ, сен аллақачон жаҳон чемпиони унвонини қўлга киритдинг - бу етарли" деганди. Ўшандан бери бу мавзуга қайта-қайта қайтамиз. Сўнгги пайтларда у менга: "Хабиб онасининг гапига қулоқ солди, сен эса онангнинг гапига киришни истамаяпсан", дейди.

Мен унга ҳеч қачон масалани бунчалик қатъий қўймаганини айтдим. У ҳеч қачон: "Ё тўхтатасан, ёки..." демасди. Яқинда у менга: "Мен Хабиб билан учрашмоқчиман. Гаплашиб олишимиз керак. Мен: "У билан нима ҳақида гаплашмоқчисиз?" деб сўрадим. У: "Биз шунчаки гаплашишимиз керак" деб жавоб берди. Мен ҳали бу учрашув ҳақида келишиб олганим йўқ. Аммо онам ҳақиқатан ҳам ўз сўзида туриб олса, албатта, бу тамом дегани", - деди Махачев "Мурад ЛяРиба" YouTube каналига берган интервьюсида.