Исроил Мадримов: "Вакилларимиз рақибдан ташқари ҳакам билан ҳам жанг қилишига тўғри келмоқда"

"Олимпиадани кузатяпмиз. Боксчиларимиз ҳам рақиб билан ҳам ҳакамлар билан жанг қилишига тўғри келмоқда. Лекин кўпроқ ҳакамлар билан курашишяпти. Биласиз, бизнинг жамоа фаворит. Билмадим энди, ҳакамлар қандай ҳисоблаяпти. Улар бизга қарши ишлаяпти. 

Миразизбек Мирзахалилов тўлиқ ютган жангда ғалабани рақибига бериб юборишди. Тушуниш жуда қийин. Барча чемпионатлар ғолиби жангни яққол устунлик билан ютаётганди, ғалаба 100 фоиз ҳамюртимизга берилиши лозим эди. Нима сабабдан рақибнинг қўли кўтарилганига тушунмадим. 

Билдик, ҳакамлар бизга қарши ишлаяпти. Буни Турсуной Раҳимованинг жангида ҳам кўрдим. Бундай вазиятлар менинг фаолиятимда ҳам кузатилган. Алам қиладигани, энг катта мусобақаларда шундай ҳолатларнинг бўлиши. 

Чунки, спортчи Олимпиада, Жаҳон чемпионати, Осиё ўйинларига узоқ йиллар давомида тайёргарлик кўради. Шунча меҳнат қилиб, энди мевасини ейман деганингизда сиздан ғалабани тортиб олишади. Албатта, бу аламли. Бундай вазиятда мен спортчиларимизга ачинаман",- деди Мадримов.

Сарвиноз РАХМОНҚУЛОВА суҳбатлашди