Истомин Чендуда бир ҳафтада 183 435 доллар ишлаб топди

Мамлакатимизнинг биринчи рақамли теннисчиси Денис Истомин 23 дақиқа давом этган финал учрашувида кипрлик Маркос Багдатисни мағлуб этди. Аниқроғи, Маркос жароҳати сабаб бешинчи геймдан сўнг баҳсни давом эттира олмаслигини маълум қилди.

Ушбу бир ҳафталик муваффақиятли иштирок ҳамюртимизга 183 минг 435 АҚШ доллари миқдоридаги мукофот пули ҳамда қимматли 250 рейтинг очкосини тақдим этди. Бу Дениснинг фаолиятидаги иккинчи ATP титули бўлди.

Эслатиб ўтамиз, Денис Истомин финалгача япониялик Юичи Сугитани 6:2, 6:7, 6:0, германиялик Ян-Леннард Штруффни 6:3, 7:6(7:3), россиялик Карен Хачановни 6:3, 6:2, америкалик Жаред Дональдсонни эса 2:6, 7:5, 7:6(7:5) ҳисобида мағлубиятга учратганди.

Таққослаш учун, Истомин айни пайтда дунё рейтингида 78, Маркос Багдатис 113, Хачанов 32, Штруфф 47, Дональдсон 58, Сугита 43-ўринни эгаллаб турибди. Багдатисни инобатга олмаганда барча рақиблар рейтингда Денисдан сезиларли даражада юқори ўринларни банд этишган.