Жаҳон чемпионати. Биргина Афрузада ғалаба, Жавоҳирда мағлубият

Бу галги жаҳон чемпионати 8, 10 ҳамда 12 ёшли шахматчилар ўртасида ташкил этиляпти. Дунёнинг 100га яқин мамлакатидан истеъдодли шахматчилар иштирок этаётган мусобақада ҳамюртларимиз – ака-ука жаҳон чемпионлари Исломбек ва Жавоҳир Синдаров, Осиё чемпиони Ҳумоюн Бекмуродов, қизлардан Мафтуна Бобомуродова, Юлия Хегай ва Афруза Ҳамдамовалар юртимиз шарафини ҳимоя қилишяпти.

Саккиз ёшлилар ўртасидаги мусобақада имкониятини синаб кўраётган Ҳумоюн Бекмуродов канадалик Кевин Жонгга ютқазиб қўйди.  

Ўн ёшли шахматчилар баҳсида биринчи рақам остида таснифланган Исломбек Синдоров оқ доналарда ўйнашига қарамай, озарбайжонлик Сулейман Сулейманли билан дуранг ўйнади.

Ўн икки ёшли шахматчилар мусобақасида иккинчи тартиб рақамли иштирокчи бўлган Жавоҳир Синдоров 2-турда кутилмаганда АҚШ вакили Айдин Тургутга ютқазиб қўйди.

Қизларимиздан Афруза Ҳамдамова иккинчи ғалабасини қўлга киритди. У рейтингда ўзидан юқорида турган россиялик Глафира Кулишни таслим этди. Юлия Хегай туркиялик Сила Каглар, Мафтуна Бобомуродова эса америкалик Рошел Ву билан муросага келди.