Жаҳон чемпионати. Ҳамюртларимиздан бу турда ҳеч ким ютқазмади

8, 10 ҳамда 12 ёшли шахматчилар ўртасида ташкил этилаётган жаҳон чемпионатида дунёнинг 100га яқин мамлакатидан истеъдодли шахматчилар иштирок этяпти.

Эътиборлиси, олти нафар шахматчимиздан бу турда ҳеч бири мағлубиятга учрамади. Саккиз ёшлилар мусобақасида ўз имкониятини синаб кўраётган Ҳумоюн Бекмуродов 9-турда қора доналарда ўйнашига қарамай, грузиялик Давид Ломтадзени мағлубиятга учратиб, очколарини 5тага етказиб олди.

Ўн ёшли шахматчилар баҳсида биринчи рақам остида таснифланган Исломбек Синдоров эса оқ доналарда ҳаракат қилиб, мўғулистонлик Баяртнар Эрхес билан дурангга имзо чекди.

Ўн икки ёшли шахматчилар мусобақасида иккинчи тартиб рақамли иштирокчи бўлиб турган Жавоҳир Синдоров қора доналарда ўйнаб, колумбиялик Хосе Кардосони мағлубиятга учратди.

Жаҳон чемпионати кашфиётига айланган Афруза Ҳамдамова бу турда ғалаба нашидасини сурди. У рейтингда ўзидан анча юқорида турган россиялик шахматчи Биковскихдан устун келди.

Ҳамюртларимиздан Юлия Хегай бельгиялик Тьяне Де Рискени мағлубиятга учратди. Мафтуна Бобомуродова эса россиялик Алиса Суровцева муроса йўлини танлади.