Жаҳон чемпионатида қатнашаётган ягона аёл шахматчимиз ҳозирча 11-ўринда!

Аёллар ўртасидаги дунё биринчилигида ягона вакиламиз Афруза Ҳамдамова (2188) юртимиз шарафини ҳимоя қилмоқда. Ёшлар ўртасида икки карра жаҳон чемпиони бўлган Афруза 4 имкониятдан 3 очко жамғариб, қўшимча кўрсаткичларга кўра 11-ўринни эгаллаб турибди. Еттинчи поғонадаги икки карра жаҳон чемпиони Валентина Гунина (FIDE, 2388) ҳисобида ҳам 3 очко бор. 

Ҳамдамова 1-турда қора доналарда ҳаракат қилганига қарамай, ҳиндистонлик гроссмейстр Рамешбабу Вайшали билан дуранг ўйнади. Иккинчи турда рейтингда ўзидан анча юқорида бораётган Лела Жавахишвили (Грузия, 2321)ни таслим этди. Учинчи турда қора доналарда ўйнаб, Миаойи Лу (Хитой, 2317)дан устун келди. Тўртинчи турда уч карра жаҳон чемпиони Анна Музичук (Украина, 2408) билан муросага келди. 

Турнир жадвалида 4 имкониятдан 4 очко жамғарган мезбонлар вакиласи Алисе Ли (АҚШ, 2415) якка пешқадам бўлиб турибди. Хитойликлар Венжун Жу (2536) ва Жонг Йи Тан (2502), ҳиндистонлик Ҳарика Дроновалли (2416), грузиялик Нино Батсиашвили (2333) ҳамда озарбайжонлик Гунай Маммадзада (2319) ҳисобида 3,5 тадан очко бор. 

АҚШ шарафини ҳимоя қилаётган Гулруҳбегим Тоҳиржонова 4 имкониятдан 2,5 очко жамғариб, қўшимча кўрсаткичларга кўра 33-поғонадан жой олган. У 2 ғалаба, 1 дуранг ва 1 мағлубият қайд этган. 

Бешинчи турда Афруза Ҳамдамова қора доналарда ўзи сингари 3 очкога эга бўлиб турган руминиялик Ирина Булмага (2378) билан ҳисоб-китоб қилади. Гулруҳбегим Тоҳиржонова эса оқ доналарда украиналик гроссмейстер Мария Музичук (2422)га қарши баҳс олиб боради.