Жаҳон чемпионатидаги энг яхши натижамиз 4-ўрин бўлди

8, 10 ҳамда 12 ёшли шахматчилар ўртасида ташкил этилган жаҳон чемпионатида дунёнинг 100га яқин мамлакатидан истеъдодли шахматчилар иштирок этди. Улар орасида терма жамоамизнинг 6 нафар аъзоси ҳам ўз имкониятини синовдан ўтказди.

Лекин натижа мураббийлар кутганчалик бўлмади. Жаҳон чемпионатидаги энг яхши натижамиз 4-ўрин бўлганлиги фикримизни тасдиқлайди. Ака-ука жаҳон чемпионлари Исломбек ва Жавоҳир Синдаровлар ўз ёш тоифаларида биринчи ҳамда иккинчи рақамли шахматчи бўлсаларда, натижага шунга монанд бўлмади.

Саккиз ёшлилар мусобақасида ўз имкониятини синаб кўрган Ҳумоюн Бекмуродов 11 имкониятдан 6,5 очко тўплаб, 47-ўринни эгаллади. Ўн ёшли шахматчилар баҳсида биринчи рақам остида таснифланган Исломбек Синдоров 6 очко билан 49-ўрин билан чекланди.

Ўн икки ёшли шахматчилар мусобақасида иккинчи тартиб рақамли иштирокчи бўлган Жавоҳир Синдоров 7 очко билан 18-поғонадан жой олди. Жаҳон чемпионати кашфиётига айланган Афруза Ҳамдамова 11 имкониятдан 8 очко тўплаб, кучли тўртликка якун ясади.

Ҳамюртларимиздан Юлия Хегай 5,5 очко билан 55, Мафтуна Бобомуродова эса 7,5 очко билан 11-ўринни банд этди.